Die Büttenrede

Elferratsvorsitzender: Holde Närrinnen und Narrhalesen,
Drause vor de Tür stehd de Jupp. Wolle mer ne roilasse?

Fasnachtspublikum (johlt, schreit): Eroi mit em! (applaudiert wie wild)

Vorsitzender (zur Fasnachtskapelle): Narrhallamarsch!

Kapelle: Dada-dammdada-dammdada-dammdididammdididammdada … duffdää-duffdäää-duffdäää!

Jupp (tritt an die Bütt): Isch bin de Jupp aus Hesse,
Seit Stunde habbisch hier gesesse
Unn hab die ganze Zeit vergesse,
Paar Krebbele zu esse.

Kapelle: Duffdäää!

Jupp: Im Lebe macht mer asch vill mit,
d’rum stehd de Jupp jetz in de Bütt.
In Hesse is heut Fassenacht
Do wärd wärklisch vill gelacht.
Die Mensche mache sisch kei Sorsche,
Mir lebe heut’, unn doch nit morsche.

Kapelle: Duffdäää!

Jupp: Mir Hesse habbe än Genie hervorgebracht.
Des hot ganz vill Gedischt’ gemacht.
Geliebt so mansches Mädsche unn sei Flöde,
De Johann Wolfgang war’s, von Goethe.

Kapelle: Duffdäää! Duffdäää!

Jupp: Als Mann von Wisseschaft erkennd ihr misch am Hud.
Unn wänn ihr’s aach nit glaahbe duud,
So habbisch sehr vill nachgedacht,
Was dem Mensch’ so Froide macht.
Nix schaffe unn än Gläsje Äppelwoi,
Mit’m Mädsche dann am schöne Rhoi.
Unn obends nach dem Schweineschnidzel,
Do brauche mir de Nervekidzel.

Kapelle: Duffdäää! Duffdäää! Duffdäää!

Jupp: Die Oma in de Küsch, die schrubbt mit IMI,
Mir gugge unser’n Färnsehkrimi,
Do schieße se unn falle um,
Isch saach zu meiner Alde: „Kumm!
De Kommissar sitzt in de Nessel,
Mir mache’s hier im Färnsehsessel!“

Publikum (singt, begleitet von der Kapelle): Uiuiuiuiuiuiui-auauauauau … dadada … Uiuiuiuiuiuiui-auauauauau! Duffdäää!

Jupp: So resche mir die Nerve uff,
Unn schüdde dann paar Schnäpsschä druff.
Isch nemm mir noch än Brod mit Hammelfett,
Um zwölfe geh’n mir dann ins Bett
Unn schlofe dann die ganse Nacht,
Bis moins de Wäggä „kling-kling“ macht.

Kapelle: Duffdäää! Duffdäää!

Jupp: Dann steh‘n mir uff unn wolle unser Ruh’
Unn degge uns mid’m Alldach zu.
Doch mansches Mol juckt uns des Fell,
Do wollnmä was erlebe, gell?!
Unn dreimal, viermal dann im Jahr,
Do suche escht mir die Gefahr.
Do fahrmä uff de Audobahn so hunnertfäzzisch
Die Fraa is blass, des Kind, des färscht sisch.
Unn mir is alles dann egal,
Isch drügge druff uff des Pedal.
Jetzt kimmt kaanä mehr an misch heran,
Isch fühl misch wie än gansä Mann.

Kapelle: Duffdäää! Duffdäää!

Jupp: Die Fraa, die rieft: „Jetz iss genuch!“
Des Kind kotzt uff de Schonbezuch.
Isch tred die Brems unn gäbbe zu,
Die Nerve brauche bissje Ruh!

Kapelle: Duffdäää! Duffdäää! Duffdäää!

Jupp: Des Lebe scheint oft ungerescht.
Doch meent es es mit uns nit schlescht.
Es quält uns nur, bis sischä is,
Dass mir’s genau so nämme, wie es is.
Helau!

(Fasnachtspublikum gibt tosenden Applaus, schunkelt, gibt Standing Ovations, schunkelt weiter.)

Vorsitzender (klingelt mit der Glocke und spricht): Dange, Jupp aus Hesse! Des war ä wunnäbare Nummä, die du uns do gebracht host. Im bürscherlische Lebe bist du Zahnarzt, abbä heude host du uns rischtisch uff de Lachnerve rumgetrambelt.
Libbä Jupp, Jahr für Jahr bringst du de Saal zum Lache mit dei‘m unvegleischlische Humoä! Hier müsse mir jetz weidermache, denn de nächste steht schon vor de Tür!
Hier habbisch noch än Geschenk für disch: Än Lachsack! Do hot mer immer was zum Lache!

(Jupp nimmt den Lachsack und lacht.)

Vorsitzender: Gell, do musste aach emol lache. Mir dange dir häzzlisch unn wünsche dir noch scheene Fassenacht unn än dreifach donnerndes „Helau“!
Publikum: Helau!
Vorsitzender: Helau!
Publikum: Helau!
Vorsitzender: Helau!
Publikum: Helau!

Vorsitzender: Auszugsmarsch!

Kapelle: Dada-dammdada-damdada-damdididamdididamdada …

(Unter Applaus marschiert Jupp ab!)